Cun ina votaziun dal pievel vulan ils iniziants laschar decider la populaziun davart il sistem politic da la vischnanca dad Ilanz/Glion. Ina dumonda centrala è, sche la vischnanca duai en l'avegnir avair in parlament pli pitschen ch’ussa, ubain sch’ins vul returnar tar la radunanza communala che bleras fracziuns avevan avant la fusiun.
Plinavant duai vegnir reponderada la posiziun dal sistem da direcziun en vischnanca e la pussaivladad dad introducir departaments per commembras e commembers da suprastanza, di Roman Cantieni, in dals iniziants.
Introducir cumissiuns
In’autra pretensiun dals iniziants è dad examinar l’introducziun da cumissiuns – en spezial ina cumissiun da bajegiar – e da giuditgar la posiziun da la cumissiun da gestiun e quella dal cussegl da scola. Quellas duas instanzas vegnan oz elegidas dal parlament communal. En l'avegnir duess ina elecziun entras la populaziun esser pussaivla.
Per ch'ina tala iniziativa saja valaivla ston ils iniziants rimnar entaifer 90 dis 150 suttascripziuns. Cun 419 suttascripziuns è quai cleramain reussì.