Il mument datti en la vischnanca da Glion enturn 40 fermadas d'autos da posta. La vischnanca sto adattar pliras fermadas per ademplir las pretensiuns da la lescha d’egualitad. Quella pretenda ch'era persunas cun impediments han access al traffic public senza restricziuns. Il medem mument duain tuttas fermadas survegnir la medema parita.
Maletg unifitgà
Cun organisar ina concurrenza d’architectura ha la suprastanza communala tschertgà ina varianta per las chasettas tar las fermadas da posta. Quellas pon vegnir montadas ton en il center a Glion sco era en tut las fracziuns. En tut han 6 biros d'architectura participà a la concurrenza.
Gudagnà ha il project dal biro d’architectura da Francesco Forcella da Glion. Sia versiun propona chasettas cun lain massiv en construcziun da stric. Las emprimas duas chasettas vegnan construidas l’auter onn: ina tar la Porta Sura dal martgà vegl, l'autra tar il Spital Regiunal da la Surselva a Glion.
Igl è sta bel da vesair quant creativ ch’ils participants èn ids vid il pensum e che nus avain retschet sis propostas interessantas.