Siglir tar il cuntegn

Header

audio
Solarexpress Ilanz/Glion: analisa da Reto Pfister
Or da Actualitad dals 27.11.2023. Maletg: RTR
laschar ir. Durada: 2 minutas 11 Secundas.
cuntegn

Ilanz/Glion Naufragi betg mo per las ovras solaras

Las duas ovras solaras en la vischnanca dad Ilanz/Glion han fatg naufragi. I deva simplamain memia bleras dumondas avertas per che la populaziun avess pudì star davos ils projects. Gnanc da discurrer sur dal temp ch’il parlament federal dat avant tar l'«express solar». Smatgar atras projects da quellas dimensiuns en dus onns, bain savend che quels avessan duvrà en ina procedura ordinaria sin il pli pauc 10 onns, ha surdumandà tut ils pertutgads.

Schleppa per il president communal

Naufragi ha era fatg il president communal, Marcus Beer. Quai ch’ins sto tegnair bun ad el è ch’el è stà il sulet ch’ha cumbattì cun corp ed olma per las ovras solaras. Co el ha fatg quai lascha enavos intgins segns da dumonda. Ins ha survegnì il sentiment ch’el ha magari sbaglià la politica cun la scola. La populaziun n’accepta betg in president che sa cumporta sco in scolast ed ella n’accepta era betg lavachaus da surengiu.

Nagin sustegn da suprastanza e parlament

Naufragi ha la finala er il sistem politic dad Ilanz/Glion fatg. Nua eran ils commembers da la suprastanza communala e nua eran quellas e quels dal parlament communal ch’han sustegnì la proposta da dar il dretg da bajegiar per l’Axpo? Tuts han laschà il president communal persul en la plievgia. Nagin n'ha vulì s’exponer tar in tema delicat che custass forsa vuschs en ina proxima elecziun.

Ch’il parlament cumbatta la suprastanza e vul dir a quella tge ch’ella haja da far è enconuschent dapi la fusiun avant 10 onns. L'express solar ha mo in’ulteriura giada cumprovà quai exemplaricamain.

Sch’ils dad Ilanz/Glion vulan dumagnar las sfidas da l'avegnir ston els debloccar lur structuras. La revisiun da la constituziun communala è la proxima schanza per quai. Forsa hai era duvrà il naufragi – per ch’il davos e la davosa dad Ilanz/Glion realiseschan che las instanzas politicas na tiran betg vi da la medema suga. Sche quai sa midass, alura savess il Na dad oz schizunt avair in’effect positiv per l’avegnir.

Reto Pfister

Reto Pfister

Producent Surselva / GR Central

Avrir la boxa da profil Serrar la boxa da profil

Reto Pfister è producent e redactur per las regiuns Surselva e Grischun Central.

RTR actualitad 17:00

Artitgels legids il pli savens