Cun la nova legislatura che cumenza il prim da schaner 2022, duai mintga suprastant surpigliar in ressort. Mintga suprastant è lura responsabel per las fatschentas politic-strategicas da quest ressort. Quai ha decidì il parlament da la vischnanca da Glion ed ha adattà las leschas correspundentas. Actualmain n'han ils suprastants nagina responsabladad da ressorts.
Vitiers munta il pensum da lavur da la presidenta communala davent dal prim da schaner 2022 ad 80%.
Sco la vischnanca da Glion scriva, ha il parlament era decidì da reorganisar l'administraziun communala. La finamira è da simplifitgar ils process da lavur.
Approvà lescha d'utilisaziun d'immobiglias
Il parlament ha plinavant approvà la lescha d'utilisaziun d'immobiglias da la vischnanca. Ina basa sin il palc legislativ ha fin uss mancà. La nova lescha regla uss las cundiziuns da rama per il diever.
Ultra da quai ha il parlament approvà la revisiun parziala da la lescha da taglia da la vischnanca. Quella cuntegna sur tut adattaziuns en la regulaziun chantunala pertutgant las taglias sin ierta e donaziuns.
La proxima seduta dal parlament ha lieu ils 25 da november 2020.
