Ilanzer Sommer - Spassegiada cun dialog sur da linguas sco punts a la libertad

Las spassegiadas da l’Ilanzer Sommer han program. Adina duas persunas che discurran sur d’ina tematica, durant ch’ins spassegia tras la citad veglia da Glion. Quella giada discurran Uolf Candrian, promotur regiunal da la Lia Rumantscha e Michail Shishkin, in dals pli enconuschents scrivents russ che viva dapi blers onns en Svizra. Ed in dals temas era l’impurtanza che la cultura ha en ina societad. Per exempel en ina dictatura sco en Russia na possia la cultura betg sa sviluppar sco giavischà, pia senza tema. Quai era l’opiniun da Shishkin en connex cun il rumantsch en Svizra, pertge en ina dictatura na pudessi ina minoritad betg exister, là valia sulet il dretg dal ferm.

Rumantschas giaudan solidaritad en Svizra

Quai era per Uolf Candrian impurtant. Il mument giaudian nus Rumantschs ina gronda bainvulientscha da las autras regiuns linguisticas e quai saja d'appreziar. Pertge uschia na stoppian nus betg cumbatter per noss dretgs, era sche squitsch possia motivar ina minoritad da chattar l’atgna identitad ed era cumbatter per quella. Dentant possian nus esser cuntents da nossa situaziun en Svizra, uschia ha ditg Uolf Candrian. Per el èsi stà interessant da discurrer cun in scrivent che vegn da tut in'autra cultura e che vesa era auter la situaziun en Svizra. Impurtant saja da restar avert per il dialog. Pertge senza dialog e chapientscha, era per minoritads, na dessi betg ina convivenza paschaivla e quella possia probabel sulet en ina democrazia vegnir garantida.