El haja vulì laschar enavos insatge per ils vegnint suenter, di l'anteriur pasterner da Vuorz Ricardo Bertogg. Per quai è el sa mess avant intgins onns vid la lavur, ed ha scrit la cronica sur da las pasternarias da Vuorz, en furma d'ina memoria.
Dus Antons Cadonau
L'istorgia entschaiva cun l'onn 1867 – lura numnadamain è naschì Anton Cadonau, l'Anton pèc sco ch'el vegniva numnà. Sco uffant è el vegnì plazzà a Milaun sco spazzachamin. Sia via ha lura manà el sur l'Engiadina enavos en Surselva. Il cronist Bertogg è plain laud per quest um modest, ch'aveva adina l'isch avert per ils pli povers. Il segund Anton Cadonau era tut in auter caliber - enconuschent en l'entir chantun sco milliunari e donatur. Grazia ad el ha Vuorz survegnì ina staziun da viafier, ina via, ina nova chasa da scola, ed il Grischun l'Ospital chantunal a Cuira.
Toni da milliuns versus Anton pèc
Il Toni da milliuns vegn bain onurà, dentant era mess sin stadaira cun l'Anton pèc. Valitar els in encunter l'auter n'è betg simpel. En mintga cas sin santeri en els dus unids, in cun ina gronda tavla sco veneraziun, e mo paucs meters dasperas è la fossa da l'auter Anton Cadonau il pèc.
La cronica ord vista dals pasterners raquinta da temps passads e fin al 2008, cura che la davosa pasternaria è vegnida serrada. Quest document da Ricardo Bertogg vegn publitgà per l’emprima giada en il «Calender per mintga gi» 2022 che cumpara il december 2021.