Da las 26 societads da tir en Surselva ch’ins ha contactà fan 19 part e 5 sa gidan. Ina manca probabel: Castrisch. Sco il president da la societad da tir da Castrisch Robert Studer ha ditg ad RTR hajan 15 da 20 commembers decidì da na betg far part. Il motiv: Quai dettia memia blera lavur cun in agen stan da sajettar.
Il president dal comité d’organisaziun da la festa da tir chantunala Marcus Caduff manegia ch’els possian tuttina organisar la festa ed i na saja betg ina tragedia che Castrisch na fa part. Els sajan dentant averts da discussiunar vinavant sur dad ina eventuala participaziun.
Rueun veva ditg gea
En ina situaziun sumeglianta è la societad da tir da Rueun stada 1987, cura che la Surselva ha organisà la festa da tir en il chantun Grischun. Rueun veva alura era in agen stan, mo ils commembers sajan stads d’accord da sa participar senza discussiun, di il president Romeo Caduff (ch’era 1987 gia president da la secziun). El sa regorda che quai ha dà blera lavura, mo i sajan restadas bunas regurdientschas e contacts cun anteriurs tiradurs.
69 schibas
Fin uss ha il comité d’organisar 69 schibas per la distanza da 300 meters. Sch’i dat pli bleras annunzias che quai ch’els hajan quintà duvrassan els in stan da sajettar da reserva, di Marcus Caduff. Els hajan gia cumenzà cun la lavur: il comité d’organisaziun saja bunamain cumplet, els sajan vid crear il logo e il concept da sponsoring.
Decisiun ils 5 da mars
Ils 5 da mars decidan delegadas e delegads a la radunanza da l’uniun chantunala, sche la Surselva survegn la festa. Sco Marcus Caduff di, saja quai mo anc ina decisiun formala. La Surselva saja il sulet candidat e sch’els veglian questa festa survegnian els ella.