Siglir tar il cuntegn

Header

Persunas enturn ina maisa vid scriver sin chartas da moderaziun lur ponderaziuns.
Legenda: Senioras e seniors da Mustér han fatg ponderaziuns per lur futur. RTR, G. Hosang
cuntegn

Surselva In lieu da s’entupada e trair a niz meglier purschidas existentas

La populaziun da Mustér sur 60 onns è stada envidada ad in lavuratori per il futur dals seniors. Envidads eran passa 600, vegnids èn 60.

La suprastanta da vischnanca Cecilia Maissen è dentant tuttina cuntenta. Sco ella di veglian ins ina giada metter sin via las novas purschidas cun las persunas che hajan interess e saja era pronta da sa gidar. L’idea da quest lavuratori che vegn sustegnì dal chantun ed accumpagnà da la Pro Senectute è da chattar bunas purschidas per seniors uschia che quels sa sentan bain a chasa e pon era viver là uschè ditg sco pussaivel e na stoppian betg ir en in chasa da vegls.

Persunas che sesan e guardan vid ina paradi cun blers palacats.
Legenda: Ils resultats dal di pendan vid la paraid e vegnan discutads. RTR, G. Hosang

Bleras ideas

Al lavuratori han las participantas ed ils participants guardà tge che las fermezzas e las flaivlezzas da la vischnanca èn. Silsuenter èsi vegnì guardà en il futur. Sco quai che la manadra dal lavuratori Madleina Barandun ha ditg saja sa mussà, ch’il pli impurtant saja in lieu da s’entupada, e da trair a niz meglier las purschidas existentas.

Elavurar las ideas fin l’atun

12 persunas sajan sa decleradas prontas d’elavurar concepts e tut tenor realisar intginas da las purschidas ch’èn vegnidas giavischadas. Ils 11 da zercladur datti l’emprim inscunter per decider la furma d’organisaziun e lura cumenzar cun la lavur. L’atun vegnan puspè tut las persunas che han sur 60 onns envidadas ad ina preschentaziun dals resultats.

Artitgels legids il pli savens

Scrollar a sanestra Scrollar a dretga