In nov auto-stgala per ils pumpiers Sursassiala

Il nov auto è dapli che mo in termagl per buobs gronds. El remplazza in vehichel ch'era passa 25 onns vegl.

Il vehichel vegl aveva ina stgala da 25 meters, quella dal nov va fin sin 32,5 meters. Uschia èn era ils pli auts bajetgs sco la Claustra, il Disentiserhof ed auters hotels meglier cuntanschibels. Cun questa stgala na pon ins betg mo liberar persunas. Ella è era concepida ch'ils pumpiers pon cumbatter il fieu sur la stgala.

Quai è dentant mo in dals avantatgs da quest nov auto-stgala dals pumpiers da Sursassiala. Il vehichel nov è vegnì adattà per las vischnancas en la regiun ed el ha inqual supplement. Il chanaster davant tir riva da purtar 450 kilos e l’entir vehichel nivellescha sasez uschia che la stgala è adina en la verticala.

500'000 francs investids en la segirezza

Il nov auto-stgala da Sursassiala ha custà in mez milliun francs. La mesadad paja l'Assicuranza d'edifizis dal Grischun ed il rest vegn reparida tenor ina clav sin las trais vischnancas da Sursassiala e quai èn Medel, Mustér e Tujetsch.

Igl è in vehichel custus. Forsa n'han ils da Sursassiala gist pervi da lur bun equipament er nagins problems da chattar avunda persunas per far pumpiers.

Sursassiala - organisaziun exemplarica

Er il chantun ha fatg cumpliments: Marcus Feltscher, il directur da l'Assicuranza d'edifizis dal Grischun, ha ditg ch'ils pumpiers da Sursassiala èn ina truppa exemplarica en il Grischun. Cumpliments che Francestg Cajacob il president da vischnanca da Mustér ha dà vinavant e manegià ch'il capitani da pumpiers ed instructur Gion Tenner haja qua gronds merits.

L'auto-scala ha num Gada

Il nov-auto scala da Sursassiala è vegnì battegià sin il num Gada. La sontga Gada è la protectura dals pumpiers, perquai ch'ella haja tenor la detga tegnì enavos in flum da lava dal vulcan Etna.