Tuttas staziuns da viafier han temp enfin l'onn 2023 per s'adattar als basegns da persunas cun impediments. Uschia era la staziun a Sedrun – per totalmain 17 milliuns francs. En ina emprima fasa è quai gia vegnì fatg l'atun da l'onn passà. La segunda fasa avess da cumenzar questa stad. I dat dentant obstachels – e quai tar il nov surpassadi dad 1,5 milliuns francs, che fiss prevesì.
La vischnanca ha en quest connex giavischà ina colliaziun dal surpassadi ed il quartier Salins cun ses runals. Ils custs dad in mez milliun francs surpigliass uschia la vischnanca. Il sutpassadi actual cun stgalas e passagi stretg na saja numnadamain betg adattà als basegns da l'avegnir. Il nov surpassadi fiss pli lartg e – tenor lescha – accessibel per glieud cun impediments. Quai oriundamain cun ina rampa.
Rampa dispitaivla
Per tscherts abitants dal quartier fiss la rampa stada memia gronda ed avess disturbà la vista. Perquai han els fatg recurs tar l'Uffizi federal da traffic, cun il giavisch da remplazzar la rampa cun in ascensur.
Per pudair cumenzar cun las lavurs ha la Viafier Matterhorn-Gottard adattà ils plans a quels giavischs. Quai ha il manader per projects da l'infrastructura Roland Heinzmann ditg ad RTR. Uschia spera la Viafier da survegnir la lubientscha da l'Uffizi da traffic. E sche tut va tenor plan avessan las lavurs dad esser a fin la stad dal 2020.
TR Telesguard 17:40 / RR actualitad 17:00