Savens vegn il directur dal runal solar a Tenna dumandà, co i saja pussibel dad ir cun skis la notg. Blers crain ch’els hajan insanua ina gronda battaria, che vegn chargiada durant il di e che furnescha l’energia la notg. Quai n’è dentant betg il cas. L’energia per ir cun skis la notg vegn da la rait electrica. Quai malgrà ch’il runal producescha dapli energia che quai ch’el dovra.
Battarias betg ecologicas
Utilisar battarias saja stà en discussiun, quella soluziun saja dentant memia cumplitgada e betg ecologica. Perquai retira il runal solar la notg l’energia da la rait, declera il directur dal runal Edi Schaufelberger. Durant il di vendian els la surproducziun d’energia, e la notg cumprian els l’energia ch’els dovrian.
12 giadas dapli energia
En tut producescha il runal en in onn 12 giadas dapli energia che quai ch’el dovra. La vendita da quella surproducziun generescha tenor Edi Schaufelberger entradas da rodund 45’000.- francs. Quai correspunda a 1/3 da las entradas totalas e cuvra ils custs da basa sco era las amortisaziuns. Il rest da las entradas vegnia da la vendita da bigliets per ir cun skis.
Entradas da bigliets impurtantas
Cunquai che las entradas da la vendita da bigliets importan 2/3 da las entradas totalas, es i impurtant per Edi Schaufelberger, ch’il runal è en funcziun. Senza quellas entradas na saja i betg pussibel da mantegnair il runal. Els sajan ina interpresa d’ir cun skis che producescha dasperas energia e betg ina ovra electrica, cun la quala ins sappia era ir cun skis. I saja dentant quietant da savair, ch’il runal genereschi entradas era cura ch’el na marscha betg.
Mez december da l'onn 2011 han ins mess en funcziun il runal solar da Tenna: l'emprim runal solar dal mund. Il Telesguard ha rapporta da questa «premiera mundiala».
Minisguard: Ord il lexicon per noss pitschens
Il futur da l'energia solara
A Tenna en la Surselva han ins bajegià in runal, ma quel n'è betg in runal sco tut ils auters. Il runal da Tenna va cun energia solara. En la Surselva datti pia l'emprim runal solar sin l'entir mund. Il Minisguard declera co in runal solar funcziuna insumma?