L'andament dals schabetgs tenor las retschertgas da RTR: L'emna passada ha in luf attatgà durant la notg ina muntanera da vatgas-mamma en Surselva. La notg enturn las 23:00, ha il pur sentì che sia muntanera ch'era en la vischinanza dal manaschi era fitg malruassaivla. Cun far la controlla ha el constatà che la muntanera era vid sa defender encunter in luf. Cun dar sbratgs e far segns da smanatscha ha il pur empruvà da spaventar il luf.
Per metter en segirtad ses animals ha il pur empruvà da manar ils animals en sia stalla. Durant ch'el fascheva quai ha il luf danovamain attatgà la muntanera pliras giadas, uschia ch'il pur è sa decidì da spaventar il luf cun la buis da chatscha. Immediat suenter il sajet ha il pur annunzià sia acziun a la surveglianza da chatscha ed a la Polizia chantunala.
Il pur sez n’ha betg vulì prender posiziun envers RTR. El vegn represchentads da la cussegliaziun purila entras il directur dil Plantahof, Peter Küchler.
Nova moda d'attatga
Per Peter Küchler, directur dal Plantahof, èsi cler, ch'il pur è stà sut grond squitsch da proteger sia muntanera envers las numerusas attatgas dal luf. Quest cas mussia a moda exemplarica co il luf s’adatteschia a las mesiras da protecziun da muntaneras. Era sche quai aveva en la vischinanza chauras e nursas, ha il luf fatg las attatgas sin la muntanera da vatgas-mamma. Quai mussia ch'ils lufs guntgeschian la protecziun da muntaneras ed emprovian da vegnir tiers lur preda sin in'autra moda. Quai ch'ins vesia era bain è ch'in luf en modus da chatscha na laschis betg spaventar uschè spert.
Consequenzas per il pur
Il cas è enconuschent ed è vegnì confermà da tut ils uffizis involvids: la surveglianza da chatscha, la Polizia chantunala, la cussegliaziun purila al Plantahof e la procura publica. Tenor las infurmaziuns da la procura publica sto il pur quintar cun ina denunzia pervia da cuntravenziun envers la lescha d’armas. Tge che stoppia vegnir eruì è sch’il pur saja stà en in stadi d'urgenza (Notstand) u betg. Cun la sentenzia sto il pur pertutgà quintar en il decurs da quest onn.