Proxim onn ha lieu en Frantscha il campiunadi europeic da ballape. Per blers fans hai lura puspè num: rimnar e midar maletgs da Panini. I dat dentant ina alternativa. L'uniun tschutti heftli, ina uniun da giuvens fans da ballape da Lucerna, edescha dapi 2008 per mintga campiunadi europeic in album da maletgs sumegliant a quel da Panini. En il album da «tschutti heftli» na tatg'ins dentant betg en fotos dals giugaders, en quai album vegnan tatgads en dissegns dals giugaders. Dissegns creads da 24 differents artists da l'entira Europa.
Concurrenza per chattar artists
Per chattar ils 24 artists ha l’uniun tschutti heftli organisà ina concurrenza da dissegnar. Ils artists che han prendì part han stuì dissegnar Zinedine Zidane, l’enconuschent giugader da ballape franzos. Ina giuria da pliras persunas, tranter auter era Gilbert Gress e Marcel Koller, han alura selecziunà ils 24 artist. In da quels è era l’architect da Glion Manuel Alhambra Diaz.
Pli gugent ils franzos ch’ils spagnols
Era sche Manuel Alhambra Diaz è naschì e creschì si en Spagna, el è cuntent ch’el dastga dissegnar ils giugaders da la Frantscha. El dissegna ils giugaders numnadamain sco sch’els fissan fatgs or d'ina construcziun d’atschal, sumegliant a la Tur d’Eiffel a Paris. Duvrar quai stil da dissegnar per in’autra equipa na fiss betg stà pussibel, perquai che la Tur d’Eiffel saja tipica per la Frantscha.
24 giugaders enfin la fin schaner
Per dissegnar ils giugaders ha Manuel Alhambra Diaz temp enfin la fin schaner 2016. Lura vegnan ils dissegns stampads. Sco l’uniun tschutti heftli scriva sin lur pagina d’internet, vegn il nov album per il campiunadi europeic lantschà ils 8 d’avrigl 2016.