«Land Art» è ina furma d'art, tar la quala las ovras artisticas vegnan creadas en il liber cun duvrar la cuntrada sezza ni objects da la natira. In exempel classic da «Land Art» è semnar sin in funs flurs sin ina tala moda, ch'i dat in muster ni in maletg, cura che las flurs flureschan. Per promover quai stil d'art en la val Stussavgia datti in concept per ina seria da lavuratoris cun il num «Alps Art Academy».
4 lavuratoris la stad 2016
L'emprima seria da lavuratoris è planisada gia per la stad 2016. Ils lavuratoris vegnan mintgamai manads da dus artists, in Svizzer ed in da l’exteriur. Sco participants èn previs en emprima lingia studentas e students d’art sco era giuvnas e giuvens artists da l’entir mund. Ils lavuratoris cuzzan 1 emna ed han la finamira, da crear almain 2 ovras d’art en la Val Stussavgia. Ovras d’art che pon puspè svanir suenter curt temp, che pon dentant era esser visiblas per plirs onns.
Senda da viandar
Per preschentar quellas ovras d’art repartidas sin l’entira Val Stussavgia, planisescha l’artist ed iniziant da la Alps Art Academy, Johannes Hedinger, ina charta da viandar. Ina charta che mussa la via a las ovras d’art e cun infurmaziuns sur da l’ovra sezza sco era sur da l’artist che ha creà quella ovra.
Pliras partidas profiteschan
Tenor Johannes Hedinger profiteschian pliras partidas d’uschia ina seria da lavuratoris. En emprima lingia ils students ed artists. Durant ils lavuratoris dettia segir blers inscunters interessants cun auters artists ed era cun ils indigens. Ils indigens da lur vart vegnian confruntads cun ideas magari nunusitadas e che mussian ina autra vista da las chaussas. Sco terz possia era il turissem profitar da l’exposiziun.
Anc en tschertga da daners
Actual saja sia lavur principala da chattar sponsurs per l’emprima ediziun da la Alps Art Academy. Fin la fin favrer haja el anc temp da rimnar ils daners che mancan anc. Lura saja tenor la planisaziun il termin final per decider, sche el possia realisar ses concept gia quest onn u pir l’onn proxim.