20 stanzas ha Peter Zumthor creà. Suenter è l'architect Giapunais Kengo Kuma stà vidlonder. El ha creà e renovà 13 stanzas en la chasa Selva. Ed ussa è il proxim architect da renum vidlonder da metter ses bul en quella chasa. Quai è nagin auter che Tadao Ando, l'architect ch'è era responsabel per il parc che duai vegnir bajegià a Val s. Pieder.
18 stanzas vegnan bajegiadas enturn tenor ils plans da Tadao Ando, e quai custa 4,5 milliuns francs. Pia ina stanza vegn a custar var 250‘000 francs. Cun Zumthor ed Ando èn dus purtaders dal premi Pritzker preschents en quai bajetg.
Thom Mayne il terz purtader dal premi Pritzker, il pli impurtant premi per architectura dal mund, vegn a crear in auter onn medemamain pliras stanzas en la chasa Selva che serva sco part dal hotel Therme da la 7132 SA.
Cun trais purtaders dal premi Pritzker sut in tetg en la chasa Selva, sappian ins discurrer d‘ina sensaziun, manegia Ernst Senteler il manader da project.