Tenor retschertgas da RadioTelevisiun Svizra Rumantscha sa tractia tar la chasa brischada d'ina chasa da vacanzas. Las 3 persunas ch'eran en la chasa eran vegnidas alarmadas d'in vischin ed han savì bandunar la chasa. Il fieu è rut ora ier saira a las 19:00.
Tenor ina communicaziun da la Polizia chantunala èn stads en acziun sur 80 pumpiers da Lumnezia e Flem. Cura ch'ils pumpiers èn arrivads sin il lieu brischava la chasa gia dal tuttafatg. Als pumpiers èsi spert reussì da dumagnar il fieu sut controlla e da proteger ina stalla ed ina chasa vischina da las flommas. Entant è il fieu stizzà ed ils pumpiers surveglian il lieu dal brischament.
Pervia dal suspect d’ina intoxicaziun da fim èn il pedel da 46 onns e duas dunnas da 37 e 22 onns vegnidas transportadas cun duas ambulanzas en l’Ospital regiunal Surselva a Glion. Il donn material na sa anc betg vegnir quantifitgà. La Polizia chantunala ha cumenzà la procedura d’inquisiziun per chattar la causa dal brischament.
RR Novitads 22:00