Siglir tar il cuntegn

Header

cuntegn

Industria Mustér L’interpresa Distec vul producir dapli per l’aviatica

L’interpresa industriala Distec a Mustér vul sa posiziunar pli fitg en il sectur da l’aviatica. Per far quai pass ha l’interpresa la finamira da survegnir fin la fin da l'onn 2020 in ulteriur certificat da qualitad. Sco ils responsabels han ditg sin dumonda da RTR è il certificat necessari per insumma pudair s’annunziar per ulteriuras offertas en la branscha d’aviatica.

Dapi il 2014 gia furnitur da Pilatus

Gia dapi il 2014 è l’interpresa industriala a Mustér gia furnitur per l’interpresa d’aviatica svizra Pilatus. Er autras interpresas en il segment d’aviatica ed en il sectur spazal, sco per exempel constructurs da rachettas per l’orbit u da parts da talas rachetas, s’audan tar la clientella da la Distec. Tgi che quai saja na possian ins dentant betg dir, cun las bleras interpresas ha la Distec ina cunvegna davart discreziun, di il mainaproject Hans-Peter Müller. Quai saja in proceder usità en la branscha.

Certificats da qualitad ston ins avair

Las preparativas per ils uschenumnads audits hajan gia cumenzà, di il mainaproject che abita en il chantun Turgovia e che tgira surtut il contact cun ils clients da l’interpresa. Las finamiras che sajan da cuntanscher saja dentant gist en il sectur da l’aviatica fitg autas e cumplexas, ma tut ils responsabels sajan persvas d’avair il certificat giavischà la fin da l’onn 2020.

Las fermezzas da la Distec

Il mument hajan ins propi betg blera lavur, di Hans-Peter Müller. Quai haja da far cun las midadas da far empustaziuns. Uschia vegnian fatgas las empustaziuns ad adina pli curta vista ed uschia saja quai difficil da planisar. Ma per l’onn 2020 sajan ins optimistic da cuntanscher sumegliantas cifras sco il 2019 e lez saja stà in bun onn per la Distec, di Müller. Pertge las fermezzas da la Distec sajan surtut las persunas che lavurian per l’interpresa, che sajan scoladas bain e motivadas. Plinavant era l’experientscha da l’interpresa e quai sajan facturs che na svaneschian betg uschia, accentuescha il vendider versà.

RTR actualitad 17:00

Artitgels legids il pli savens

Ir a sanester Ir a dretg