Siglir tar il cuntegn

Header

La chasa da tgira S. Vigeli a Sedrun.
Legenda: La chasa da tgira S. Vigeli a Sedrun. RTR, G. Hosang
cuntegn

Surselva Infurmaziun davart serrada da la Tgèsa S. Vigeli a Sedrun

Il schaner è il termin definitiv per serrar la chasa da tgira S. Vigeli vegnì communitgà. Ussa è la populaziun vegnida infurmada co quai duai succeder.

I n’è betg insatge nov che la Tgésa S. Vigeli sto vegnir serrada. Gia 2013 èsi stà cler ch’i ha tenor il chantun memia blers letgs da tgira en Sursassiala. Il chantun aveva lura curregì la cifra dal basegn da letgs da tgira da 72 sin 58. Cun la chasa da tgira ch'è vegnida bajegiada a Mustér avevan ins gia cuntanschì questa quantitad. Perquai eri cler che la chasa da tgira S. Vigeli stoppia vegnir serrada baud u tard.

Il manader da las duas chasas da tgira a Mustér e Sedrun, Diego Deplazes è optimistic ch’ins chatta per tut ils cussedents ina buna soluziun. Dus cussadents sajan gia vegnids a Mustér in terz fetschia quest pass l’emna proxima. Damai ch’ina midada saja tant per ils cussedents sco era per ils stretg parents ina chaussa fitg emoziunala saja la communicaziun fitg impurtanta: «Ins sto communitgar avert e cler e mussar si tge alternativas ch’i dat», di Diego Deplazes. Cussadents e parents hajan la pussaivladad da vegnir a mirar la chasa da tgira a Mustér per uschia pudair far sez in maletg.

Novs cussadents a Sedrun

Per che la chasa da tgira possia vegnir manada a Sedrun fin l’avrigl 2017 dastga il dumber da cussedents betg vegnir memia pitschen. Perquai prenda la Tgèsa S. Vigeli era si novs cussedents. Tenor Diego Deplazes sajan quai cussedents che dovrian mo temporar tgira perquai ch’i vegnian gist ord spital e na possian betg star sulet ubain perquai ch’i haja en il lieu giavischà en il mument nagin plaz ed il cussedent stoppia avair tgira. Cun quai possia ins gidar da cuvrir almain in zichel ils custs dal manaschi.

Tschertgar soluziuns per il persunal

Pertutgads è dentant era il persunal che lavura actualmain en la Tgèsa S. Vigeli. Persunal da tgira saja scart ed uschia è Diego Deplazes segir ch’el po dar a las collavuraturs e collavuraturs, sch’el giavischan, era a Mustér ina plazza. Tar il persunal da l’economia e gastronomia vegnia quai dentant in zichel pli grev. En quest secturs saja la fluctuaziun pli pitschna. Per pudair optimar ils custs e tuttina mantegnair la qualitad vegnan las structuras adattadas. Uschia è il manader da la tgira a Sedrun betg vegnì remplazzà cura che quel ha demissiunà. La responsabladad surpiglia il manader da la tgira a Mustér, di Diego Deplazes. Davent dal matg vegnia era betg pli cuschinà a Sedrun. Las tratgas vegnan cuschinadas a Mustér e transportadas a Sedrun. Da la gastronomia dettia quai dentant gia persunal ch’ins haja pudì occupar a Mustér, di Diego Deplazes. Fin l’avrigl vegnia il cussegl d’administraziun adina puspè a stuair giuditgar da nov la situaziun cun la Tgèsa S. Vigeli per pudair ademplir ils duairs e mantegnair la qualitad.

Artitgels legids il pli savens

Scrollar a sanestra Scrollar a dretga