Siglir tar il cuntegn

Header

cuntegn

Surselva Iniziants fusiun Cadi: «Tujetsch serra ils egls a la realitad»

Quai dian ils iniziants da l’iniziativa «Lantschar contractivas da fusiun en la Cadi». Uss han els prendì posiziun al messadi da la suprastanza da vischnanca da Tujetsch al Cussegl communal.

La suprastanza da Tujetsch ha proponì da na betg entrar en contractivas da fusiun. Ella preferescha da collavurar tranter las vischnancas. Mo in dals iniziants, Renè Epp, fa valair ch’ins haja empruvà da collavurar sin nivel intercommunal, uss dovria quai contractivas da fusiun liantas.

Tuttina realisar gronds projects

In argument da la suprastanza è, che Tujetsch duai restar vinavant ina vischnanca “interessanta, viva ed autonoma”. La populaziun duai pudair decider sezza davart investiziuns, projects ed ulteriuras fatschentas. Ils iniziants dian che quests projects possian era vegnir realisads en l’avegnir. Mo ins stoppia reparter els en mintga vischnanca; e là stoppian ins sensibilisar la populaziun per questa strategia. Alura possian ins schizunt spargnar daners e tuttina realisar gronds projects en la regiun, di Epp.

Far pli attractiv ils plazs da lavur

L’argument che plazs da lavur giajan a perder na laschan ils iniziants era betg valair. Cun ina strategia cumplessiva possian ins guardar da far pli attractivas las plazzas e da crear forsa plazzas novas e surtut era da mantegnair ellas. Sch’ins stettia persuls vegniss quai in bun ton pli grev.

Pli prudent d'elavurar ils fatgs

La proposta da la suprastanza communala da Tujetsch da refusar l’iniziativa saja pac prospectiva e surtut serria ella ils egls avant la realitad ed il svilup. I fiss pli prudent d’elavurar ils fatgs e cumparegliar cun las supposiziuns ed alura decider.

Pertge betg integrà Breil?

Il president communal da Tujetsch Beat Roeschlin fa valair ch’i manchia ina finamira surordinada. Quai na possia betg esser mo ina fusiun per amur d’ina fusiun. E la finamira impurtanta saja en il turissem. Pertge na han ils iniziants betg integrà la vischnanca da Breil en quest project, sa dumonda Roeschlin. Cun Breil, Mustér e Sedrun avess ins ina ferma destinaziun da turissem en la Cadi.

Na betg tema d'esser isolà

En connex cun il tema da restar isolads di il president che sia vischnanca haja dumagnà la via fin uss. Talas resalvas fissan giustifitgadas sch’i giess mal cun la vischnanca. Il tema fusiun en la Cadi fiss dentant ina finamira a lunga vista.

Cussegl da vischnanca da Tujetsch decida mesemna

Uss mesemna che vegn sto il Cussegl communal da Tujetsch prender posiziun. Sch’el di gea sto la suprastanza cumenzar contractivas da fusiun cun las autras quatter vischnancas, sch’el di na ston votantas e votants decider.

RR actualitad 17:00

Artitgels legids il pli savens