A Mustér datti in glatsch artifizial, u meglier ditg: fin uss hai dà in. L'enviern proxim na pon pitschen e grond betg pli ir cun patinas sper il Center Fontauna. Il cussegl da vischnanca da Mustér ha dacurt numnadamain refusà in credit da 1,1 milliuns francs per la sanaziun da la patinera. Abitantas ed abitants han per part chapientscha ma deploreschan er che la purschida d'enviern, sper las pistas, n'è betg pli.
La suprastanza vul...
Clemens Berther ch'è en la suprastanza communala da Mustér e presidiescha la cumissiun da manaschi dal Center Fontauna ha preschentà al parlament la proposta da sanar la patinera. Il suprastant è stà trumpà ch'il credit è vegnì refusà, perquai ch'i dat il glatsch artifizial gia dapi passa 30 onns.
Nus n'avain uss davent da Flem fin a Tschamut nagina patinera artifiziala. Quai è fitg donn.
Trumpà na saja el betg mo da la decisiun sco tala, mabain er da l'agir dal cussegl da vischnanca. El avess giavischà ch'il parlament laschia decider il pievel.
... il parlament betg
Theres Burri Gadola, presidenta dal parlament, è da l'avis ch'il parlament haja la legitimaziun e l'obligaziun da decider. La finala hajan la finala plirs facturs chaschunà il Na. Quai sajan per exempel ils auts custs da mantegnair il glatsch ni era ch'auters gronds projects èn actualmain pendents a Mustér.
Ina maioritad dal cussegl è stada da l'avis da metter da la vart ils daners per la scola. I va per priorisar projects.
La suprastanza communala vuleva plinavant cuvrir ils custs per la sanaziun da 1,1 milliuns francs cun ina part dal gudogn da l'onn 2025. La maioritad dal parlament ha dentant priorisà pli fitg auters projects. Il gudogn duai vegnir duvrà per la renovaziun dal bajetg da scola che spetga.