En il chantun Grischun datti actualmain 5'000 registraziuns tar las assicuranzas socialas. Da quai èn la mesadad cas cun restricziuns psichicas. En Surselva datti 100-150 cas ad onn, da quai var 40% cas cun impediments psichics. Integrar quellas persunas en la vita da mintga di, quai è ina da las pli grondas sfidas per ils cussegliaders d'integraziun regiunals.
L'Assicuranza d'invaliditad è perquai sin tura en l'entir chantun Grischun. In appel als patruns en il Grischun è da s’occupar da l'integraziun da persunas cun restricziuns. En il focus èn persunas cun restricziuns psichicas. L'ospital da Glion e la firma da bajegiar Berther SA da Mustér èn duas firmas exemplaricas ch'èn gia activas en quella integraziun.
En tut lavuran 150 persunas tar la Berther SA, 4 persunas èn ord il program d’integraziun. Tar l'ospital da Glion èn quai 6 persunas en il program d’integraziun e quai sin 260 conlavureras e conlavurers.
Sco quai che Felix Flepp il cussegliader d’integraziun a Glion di, saja pli simpel per ina fatschenta gronda d’integrar persunas cun restricziuns psichicas. I dettia dentant era adina puspè exempels nua che firmas bler pli pitschnas fan quai cun success dapi onns.
RR actualitad 11:00