Siglir tar il cuntegn

Surselva Istorgia turbulenta da Sedrun Mustér Turissem

SMT ha gì plirs directurs/mainafatschenta e presidents dapi la fusiun da las uniuns da traffic da Mustér e Sedrun 1998. En tut èn stads fin uss 9 manaders operativs ed 8 presidents. In mainafatschenta è schizunt vegnì relaschà suenter in mez onn.

Biro da Sedrun Mustér Turissem a Sedrun.
Legenda: Biro da Sedrun Mustér Turissem a Sedrun. RTR/H. Giger

Igl è stà 1998: Alura han las duas uniuns da traffic da Mustér e Sedrun fusiunà a Sedrun Mustér Turissem SMT. Mo entaifer questa organisaziun nova hai dà duas interpresas parallelas: Sedrun Mustér Turissem ch’era responsabla per tut ils servetschs per ils clients al lieu e Mustér Sedrun Marketing che venda la destinaziun. Questas structuras han chaschunà discussiuns, e discussiuns ha quai era dà adina puspè tranter las duas vischnancas, tranter vischnancas e las duas pendicularas ubain tranter SMT e las pendicularas/vischnancas. Mo era suenter che las structuras èn vegnidas simplifitgadas cun stgaffir mo in’organisaziun da turissem n'èn las dispitas betg stadas a fin.

Nova emprova

2010 hai dà ina emprova da chattar ina schliaziun. Ils turistichers han instradà ina maisa radunda cun il manader da project Marcel Friberg. 2013 han SMT e Grischun vacanzas GV communitgà che l’organisaziun chantunala surpiglia il marketing da SMT.

Eclat matg 2015

Ma l’istorgia n’ha betg anc gì ina buna fin. Il matg passà ha la vischnanca da Tujetsch communitgà ch’ella viseschia il contract da collavuraziun cun SMT. Las finamiras da marketing na sajan betg las medemas, ha il president Beat Roeschlin ditg.

Quels dis èn ils responsabels da Sedrun Mustér Turissem s’inscuntrads cun il chantun. La finamira è da decider, co quai va vinavant.