Siglir tar il cuntegn

Header

video
Impressiuns dal cortegi da festa
Or da RTR dals 23.05.2016.
laschar ir. Durada: 37 Secundas.
cuntegn

Surselva «Jau spera che quai dettia era in di musicants per la musica»

Dapi 125 onns datti la Societad da musica Falera. Raschun da sa regurdar cun Risch Cathomen ch’è il pli ditg musicant activ.

58 onns è Risch Cathomen gia activ en la Societad da musica Falera. El po sa regurdar ch’i vegniva sunà plitost simpels tocs e che las emprovas n’eran betg uschè lungas sco oz.

audio
Risch Cathomen davart ses 58 onns en la Societad da musica Falera
ord RTR Audio dals 18.05.2016.
laschar ir. Durada: 4 minutas 17 Secundas.

Dapi 1987 cura che la musica da Falera haja cuntanschì in fitg bun resultat a la festa da musica chantunala a S. Murezzan saja la motivaziun era creschida dad augmentar cuntinuadamain il nivel. La finala è la Societad da musica Falera sa participada 2015 a la festa da musica districtuala a Sursaissa per l’emprima giada en la secunda classa.

Fin il 1978 n’haja la musica da Falera era mai gì ina atgna unifurma. Fin la saja adina vegnì cumprà unifurmas dad autras societads da musica, di Risch Cathomen. Per il giubileum da quest onn ha la societad dentant cumprà ina nova unifurma. Igl è la terza unifurma nova per la musica.

Spera ch’era il biadis daventan musicants

Risch Cathomen è sez stà 14 onns president da la Societad da musica Falera. Actualmain èn ses uffants en suprastanza e tiran il char. Uschia è la figlia Heidi Casutt presidenta, la figlia Sonja Pirovino actuara ed il figl Duri Cathomen è il dirigent. «Quai fa a mai grond plaschair ch’els s’engaschan per la musica» di Risch Cathomen.

Forsa saja era ses tat la culpa che la famiglia Cathomen è uschè activa en la musica. Gion Giacun Cathomen saja numnadamain stà in dals trais iniziants e l’emprim president da la Societad da musica.Interess paran era ils biadis da Risch Cathomen a mussar per la musica. Ils ins vegnian gia da dar intgins tuns: «Jau spera schon che quai dettia era in di musicants uschia che las proximas generaziun haja quai anc a Falera ina stupenta societad da musica».

Artitgels legids il pli savens