Pervi da la protecziun da datas e l’automatisaziun na po la Banca chantunala Grischuna (BCG) strusch pli porscher jobs da stad. Sco gronda fatschenta en il Grischun sa senta la banca dentant tuttina responsabla da pudair porscher tals jobs ed ha uschia chattà la collavuraziun cun il Project guaud da muntogna. 60 giuvnas e giuvens tranter 15 e 19 onns, pon lavurar in’emna en il guaud e survegnan 500 francs paja.
La paja è era ina motivaziun
Ils jobs da vacanzas sajan tschertgads, declera il manader da persunal da la BCG, Alexander Villiger. En tut hajan els survegnì 140 annunzias per las 60 plazzas. Viliger smina ch’era la paja motivescha las giuvnas e giuvens da s’annunziar. Quai conferman era las giuvnas e giuvens che lavuran questa emna en il guaud da Laax. Sper il plaschair da pudair s’engaschar a favur dal guaud saja era la paja impurtanta, raquintan els.
In tschert squitsch
Ils giuvenils han da motivar tar lur annunzia pertge ch’els èn adattads per quest job da stad. Sco Alexander Villiger di, vegnia lura era guardà sche la giuvna u giuven è adattà per la lavur en il guaud e sch’el ha l’equipament necessari, sco chalzers da muntogna, resti da plievgia etc.
Sco quai ch’il gestiunari dal Project guaud da muntogna, Martin Kreiliger di, saja quai schon ina differenza sch’ils giuvenils vegnian pajads u betg. La finala suttascrivian els cun la banca in contract da lavur per quella emna ed uschia sajan ils giuvenils era in pau sut squitsch da mussar ina buna prestaziun.
La banca impunda per quests jobs da stad rodund 100’000 francs. Sper las pajas dals giuvenils vegn era pajà ils manaders ed il material.