Siglir tar il cuntegn

Surselva L’appel da spargnar aua vala per tuts

Ils dis passads ha la lavandaria dal nov Coop gì lantschà in’acziun da lavar l’auto gratuitamain, sco RTR ha rapportà. Quai malgrà il fatg, ch’igl è stà ed è anc adina fitg sitg. Perquai ha la vischnanca da Glion appellà ils 3 d’avust a la populaziun da spargnar aua.

Resultats da la schitgira
Legenda: Resultats da la schitgira RTR, Linus Livers

Quest appel valia per tut quels che dovrian aua ord la rait da la vischnanca da Glion, era per las fatschentas ed ils interprendiders. Els supplitgeschian tuts da surprender ina part da questa responsabladad ed esser solidarics, di la presidenta da la vischnanca da Glion, Carmelia Maissen. Perquai n'haja ella betg blera chapientscha per quest’acziun da lavar l’auto gratuitamain.

Naginas reclamaziuns

Sco Carmelia Maissen di, n'hajan ils abitants da la vischnanca da Glion dentant betg reclamà tar els pervi da questa acziun. Ma ella supponia che quai saja in tema tar la populaziun.

Betg dramatisar la situaziun

L’appel da spargnar resta en vigur. Igl haja bain pluvì in pau, quai na tanschia però betg per emplenir ils reservuars da la vischnanca da Glion. Ins na sappia era betg, co l’aura sa sviluppeschia las emnas che vegnian. E surtut l’atun giajan ils reservuars in pau enavos.

Ins na stoppia dentant er betg dramatisar la situaziun, concluda la presidenta da Glion. I saja dentant prudent ed impurtant da prender uss mesiras che sajan atgnamain anc supportablas.

RR actualitad 17:00