Siglir tar il cuntegn

Surselva L'atun cumenzan las lavurs per la surbajegiada «Sut Gliendas»

La societad Sut Gliendas SA cumenza cun la construcziun da la surbajegiada en il decurs da l’atun.

Visualisaziun da la surbajegiada Sut Gliendas.
Legenda: Visualisaziun da la surbajegiada Sut Gliendas. mad

L’avrigl 2016 ha la suprastanza communala approvà il project per ina surbajegiada, nua che pliras generaziuns pon viver sut in tetg, ina uschenumnada surbajegiada per generaziuns, e dà la lubientscha da bajegiar questa.

La surbajegiada po vegnir erigida en dretg da bajegiar sin terren da la vischnanca da Mustér. Sco quai che la societad Sut Gliendas SA scriva en ina communicaziun hajan ins pudì garantir l’interess public, il diever entras persunas attempadas sco era la collavuraziun cun la chasa da tgira Puntreis ed il servetsch da spitex.

Visualisaziun da la surbajegiada Sut Gliendas, davent da la Via S. Gions.
Legenda: Visualisaziun da la surbajegiada Sut Gliendas, davent da la Via S. Gions. mad

Igl è previs d’eriger trais chasas cun total 23 abitaziuns da dus fin 4 ½ stanzas. Sco quai che la societad communitgescha, vegnan questas affittadas en emprima lingia a persunas attempadas, dentant era a famiglias ed autras persunas. Cun quai vul la societad cuntanscher ina buna maschaida da generaziuns. En las chasas èn er previs locals per la plaiv e locals per la communitad ed entamez ina plazza publica per entupadas.

Las lavurs da construcziun duain cumenzar en il decurs da l’atun. Sche tut giaja tenor plan possian las emprimas abitaziuns vegnir retratgas la primavaira 2018, scriva la Sut Gliendas SA.