Siglir tar il cuntegn
Inhalt

Surselva L'emprim teater a Trun dapi 9 onns: «Davos ils set binaris»

2009 ha l’uniun da teater Trun dà l’ultim toc fin uss: Ils determinads da Elias Canetti. 2018 datti puspè ina producziun: Davos ils set binaris tenor il film da Kurt Früh. I sa tracta da l’istorgia da trais clochards che gidan ina mamma giuvna cun ses pop.

Acturs e reschissur durant in exercizi
Legenda: Acturs e reschissur durant in exercizi RTR, Hubert Giger

Esser natiral

Ils emprims exercizis ch’il reschissur Linus Flepp fa, èn: emprender da discurrer senza esser teatralic. Ins stoppia esser natiral sco quai ch’ins saja sin via. Perquai di el adina: Giai a chasa e guardai co vus discurris là, e suenter emprendain nus da discurrer uschia sin tribuna.

Il segund pass è alura dad emprender ordadora. Quai vegnia ad esser detg pretensius, manegia Roland Tomaschett che fa per l’emprima giada teater. Era Adriana Albin n'è mai anc stada sin tribuna. Ella è oriunda da Cuira e viva dapi dus onns a Trun, ed ella chapescha rumantsch. Sco ella ha ditg ad RTR, haja ella fatg la scola da polizia e là hajan els era stuì far scenas sco en il teater. Quai haja ella fatg gugent e perquai saja ella sa decidida da far uss ina rolla en il toc Davos ils set binaris.I na saja però betg simpel da pronunziar endretg il text.

Plans gia il 2012

Sco Silvio Albin che ha gia fatg pliras rollas raquinta, aveva l’uniun da teater Trun vulì preschentar il toc actual gia il 2012, cura che la Viafier Retica ha festivà il giubileum da 100 onns Cuira – Mustér. Ma pervia da la coincidenza cun la festa da chant chantunala a Trun na saja quai betg reussì. Bleras persunas sajan numnadamain stadas engaschadas per quest eveniment.

E pir il 2016 hajan els, in comité ad hoc, puspè empruvà da sa preschentar sin tribuna cun Davos ils set binaris. La finala hajan els era chattà in reschissur cun Linus Flepp che stat a Mustér.

Silvio Albin fa la rolla da Barbarossa, in dals trais clochards. In motiv da preschentar quest toc è era che en il film è Zarli Carigiet da Trun il clochard Dürst.

La premiera dal toc è sonda, ils 10 da november 2018. Previs èsi da sa preschentar sis giadas.

RR actualitad 08:00