Siglir tar il cuntegn

Header

cuntegn

Surselva L’emprima lavina – la massa naiv fa fastidis

L’enviern 1974 / 75 è stà lung ed ha purtà blera naiv. Uschia faschevan las massas da naiv fastidis l’avrigl 1975.

L'enviern 1974/75 è stà in lung enviern. Quai pon ins intervegnir da differents rapports. L’enviern haja gia cumenzà ils 26 da settember, scriva Martin Bearth il matg 1975 en la «Gasetta Romontscha» sa referent sin ina documentaziun da Carli Flepp (1924-2011) dad Acla. Quai enviern haja quai dà enturn 11,50 meters naiv. 2,80 meters sulet tranter ils 4 e 17 d’avrigl.

I na ceda betg da naiver

audio
Battesta Flepp ch’era da quest temp president communal descriva la situaziun en Val Medel.
ord RTR Audio dals 24.03.2015.
laschar ir. Durada: 1 minuta 52 Secundas.

Ils 4 d’avrigl 1975 han ins mesirà ad Acla enturn mezdi 50 cm naiv nova. Quai scriva era il schef da salvament e manader dal servetsch da lavinas da la vischnanca da Mustér, Pius Condrau (1924-2013). El era en stretg contact cun il president da vischnanca da Medel, Battesta Flepp (1931-1975), ch’abitava ad Acla. Las navadas faschevan gronds fastidis a Pius Condrau.

Il suentermezdi avess ins gugent evacuà las persunas en la Val Medel ch’eran en lieus periclitads. Quai n’è dentant betg stà pussaivel, perquai che l’aura na pussibilitava betg da sgular.

La populaziun è ruassaivla e duai era restar ruassaivla. Cunzunt èsi d’evitar las zonas privlusas.
Autur: Battesta Flepp Da lez temp president communal

La saira han ils abitants dad Acla cumenzà a far quitads pervi da la situaziun. Era Battesta Flepp, che aveva persequità l’entir enviern la naiv en ils auts, era daventà malsegir. Ils 5 d’avrigl 1975 declera el en las novitads da las 19:30 al Radio Rumantsch che la populaziun saja ruassaivla, e ch'i na regia nagina panica, malgrà la lavina a Platta che haja destruì differents bajetgs.

Nagina electricitad e nagin telefon

audio
Giusep Bearth raquinta a Clemens Pally dal Radio Rumantsch co quai è stà la notg dals 5 sin ils 6 d’avrigl
ord RTR Audio dals 24.03.2015.
laschar ir. Durada: 4 minutas 30 Secundas.

Curt suenter ha Battesta Flepp telefonà a ses frar Carli Flepp e ditg ch’el giaja cun sia famiglia giudim il vitg tar Maurus Venzin (1935-1975). Las chasas giudim il vitg valevan sco il lieu il pli segir.

Da las 21.30 è lura l’emprima lavina vegnida. La «lavina dalla Muota» sco quai ch’ella vegniva numnada. Quella ha destruì la punt che colliava il vitg cun la via principala ed il transfurmatur d’electricitad. Ad Acla hai nagina electricitad pli ed era la lingia da telefon è interrutta. Sulet il president da vischnanca Battesta Flepp ha ina colliaziun da func cun Mustér.

Artitgels legids il pli savens