Siglir tar il cuntegn

Header

cuntegn

Surselva L'hotel Waldhaus a Flem è concurs

Mardi en damaun ha il cussegl d'administraziun deponì la bilantscha ed uschia annunzià il concurs da l’hotel Waldhaus Flims Mountain Resort.

  • hotel Waldhaus Flims Mountain Resort è concurs
  • hotel ha stuì far amortisaziuns da 30 milliuns francs
  • vischnanca da Flem è preoccupada dal concurs
  • Uffizi da concurs dal district Plaun conferma concurs summaric

Pers il cumbat cunter problems finanzials

audio
Mezdi: Hotel Waldhaus a Flem è concurs
ord Actualitad dals 07.04.2015.
laschar ir. Durada: 49 Secundas.

Gia dapi onns cumbatteva il «Waldhaus Flims Mountain Resort» cun problems finanzials. Il manaschi haja funcziunà vinavant be grazia a gudogns entras venditas d'abitaziuns secundaras. Il favrer hajan ins dentant valità da nov il manaschi e stuì far amortisaziuns da 30 milliuns francs. Las mesiras per sanar las finanzas e las tractativas cun in vestiders per surpigliar la societad n'hajan betg purtà fritg, uschia ha il cussegl d’administraziun infurmà ad ina conferenza a las medias.

Plazzas van a perder

7 persunas perdan lur lavur, las ulteriuras 120 persunas pon tegnair lur plazza. Las pajas sajan garantidas enfin la fin da mars 2015 ed ils quints da furniturs hajan ins pudì pajar enfin il favrer. Ils passa 900 acziunaris perdan dentant lur chapital da 10,8 milliuns francs è vegnì infurmà vinavant.

Manaschi da stad è garantì

Il manaschi da l'hotel cuntinuescha entant senza interrupziun. La societad «WF Hotelmanagement» ha prendì a tschains il manaschi da l'Uffizi da concurs. A la testa èn sco enfin ussa il directur Daniel Füglister ed il president dal cussegl d'administraziun Gion J. Fravi.

L'alternativa al recurs fiss stà da serrar l'hotel e da relaschar tut ils collavuraturs.
Autur: Gion J. Fravi President cussegl d’administraziun

Massa da concurs

audio
Saira: Waldhaus Flem – quai capita tar il concurs
ord Actualitad dals 07.04.2015.
laschar ir. Durada: 3 minutas 4 Secundas.

Beat Caluori da l’Uffizi da concurs dal district Plaun è dapi trais emnas involvì en ils fatgs da fatschenta da l’hotel Waldhaus. Ins haja ussa cumenzà la procedura da concurs ed els sajan vida survegnir ina survista e da registrar tut las activas. El quinta che quai cuzza fin quatter emnas.

Il concurs da l’hotel «Waldhaus Flims Mountain Resort» dat in concurs summaric pia na datti betg ina radunanza da crediturs.

Impurtant hotel en Svizra

L'hotel Waldhaus a Flem s'auda tar ils impurtants hotels da la Svizra e posseda era in dals pli gronds parcs d'hotel (passa 200'000 meters quadrats). L'onn 2004 ha l'hotel survegnì la distincziun «hotel da l'onn» dal Gault Millau e l'onn 2006 ha la sessiun federala gì lieu en il Waldhaus a Flem.

Reacziun da la vischnanca

La suprastanza communala da Flem sa mussa preoccupada dal concurs da l’hotel Waldhaus. Sco la vischnanca da Flem scriva en ina communicaziun beneventia ella ils sforzs da la societad da salvament. Ella saja era pronta da sa gidar en il rom da sias pussaivladads, mo concret saja anc nagut èsi scrit vinavant.

L’hotel «Waldhaus Flims Mountain Resort» saja cun sia muntada per la regiun turistica Flem/Laax/Falera da fitg gronda impurtanza. Il pli impurtant saja che l’hotel possia vegnir avert da Tschuncaisma sco previs.

RR novitads 11:30/15:00/17:00

Artitgels legids il pli savens