Siglir tar il cuntegn

Header

Tenor las prognosas da l'aura pudess i dar in open air da lozza.
Legenda: Tenor las prognosas da l'aura pudess i dar in open air da lozza. RTR, Linus Livers
cuntegn

Surselva L'Open Air Lumnezia 2016 ha cumenzà

Dapi l’onn passà cumenza l’Open Air Lumnezia gia la gievgia. Cun circa 4'000 visitaders è quai di main visità ch’ils auters dis, ma è perquai pli famigliar.

L’onn passà han ils organisaturs da l’Open Air Lumnezia decidì da prolungar la festa da 2 sin 3 dis e da cumenzar cun ils concerts gia la gievgia. Il di supplementar è vegnì planisà sco in di da bands indigenas e bands giuvnas. Quintà aveva il comité d’organisaziun cun var 1’500 persunas quai di supplementar, arrivads eran lura passa 4’000. Quai aveva dà inqual virivari e l’Open Air Lumnezia era vegnì crititgà perquai.

Bindels d’entrada gia a Glion

Quest onn han ils responsabels reagì ed han planisà ordavant gia cun 4’000 visitaders. Era esì stà pussaivel da retrair ils bindels d’entrada gia a Glion. Uschia han las persunas che han fatg quai, pudì entrar en l’areal senza star en colonna. Uschia n’hai betg dà problems a l’entrada quest onn.

Tut è preparà per l'Open Air Lumnezia 2016.
Legenda: Tut è preparà per l'Open Air Lumnezia 2016. RTR, Linus Livers

Gievgia – il di dals fans d’open airs

Cun circa 4’000 visitaders è la gievgia main frequentada ch’ils auters dis da l’Open Air Lumnezia. Preschents èn cunzunt ils fans d’open airs che prendan schizunt liber aposta per pudair visitar l’open air. Uschia è l’atmosfera tar ils visitaders da la gievgia tut speziala e famigliara cumpareglià cun ils auters dis da l’open air.