Siglir tar il cuntegn
Inhalt

Surselva L’uniun Pro Flem Cassons vul mantegnair la pendiculara

È nossa lavur da 6 onns stada per nagut? E co vinavant? Cun quests pleds ha il president da l’uniun Pro Flem Cassons Hans Sutter avert la radunanza da commembers sonda saira a Flem.

La pendiculara da Cassons
Legenda: La pendiculara da Cassons RTR

Anc adina è la pendiculara da Cassons in tema emoziunal. Quai è sa mussà en plirs votums. Ed intgins commembers han era crititgà la vischnanca da Flem e la gruppa da l’Arena Alva. Mo Hans Sutter di ch’els stoppian acceptar la decisiun da Flem. Dacurt han votantas e votants detg gea al credit da planisaziun da 850’000 francs per la varianta Y.

Betg demontar

Suenter questa decisiun vul l’uniun Pro Flem Cassons dentant tschertgar vinavant il discurs cun la vischnanca da Flem e l’Arena Alva. Plinavant vegn pretendì che la pendiculara da Cassons na dastga betg vegnir demontada, fin che la nova pendiculara da la varianta Y è en funcziun. Ils daners, 1 milliuns francs, ch’eran vegnids rimnads per sanar la pendiculara da Cassons, restan sin in conto fin ch’ins sa sche la varianta Y vegn realisada.

Betg schliar l'uniun

Ed ils commembers da l’uniun èn cleramain dal maini che l’uniun stoppia exister vinavant. Ina radunanza extraordinaria da Pascas 2016 duai lura decider sur da finamiras e da la strategia futura.