La festa da chant a Falera è stada in success – era finanzialmain

Tenor il rapport dal president dal comité d’organisaziun han las uniuns involvidas fatg in gudogn da radund 80’000 francs.

Il logo da Falera conta 2017. Bild in Lightbox öffnen.

Legenda da maletgs: Il logo da Falera conta 2017. mad

Tenor il rapport final dal comité d'organisaziun è la 45avla festa da chant sursilvana 2017 a Falera stada in success. Sco il president dal comité Giusep Giuanin Decurtins scriva en il rapport, èn 32 chors cun circa 1'050 chantaduras e chantadurs sa participads a la festa. Quels chors han interpretà 79 chanzuns da pag, e quai cun bun success. Dals 28 chors che han giavischà in predicat han 13 cuntanschì in «excellent», in nov record ad ina festa da chant sursilvana.

Gronda lavur dals voluntaris

In grond engraziament trametta il president era als circa 350 voluntaris ed a las 13 uniuns che han lavurà durant la festa sin agen quint, p.ex. cun manar in'ustaria, u ch'èn vegnidas indemnisadas dal comité d'organisaziun. Mo grazia a lur agid saja stà pussibel d'organisar la festa da chant.

80'000 francs per las uniuns

Quai engaschi è era stà profitabel per las uniuns. En tut han las uniuns involvidas fatg in gudogn schuber da radund 80'000 francs. Las uniuns che han lavurà sin agen quint han fatg in gudogn da 39'000 francs ed il Chor viril-baselgia da Falera ha sco organisatur uss circa 41'000 francs dapli en cassa.

RR actualitad 17:00