La fiera da vinars è l'ultima fiera da l'onn a Glion. I vegn pretendì ch'ils politichers hajan pli baud regalà l'ina u l'autra runda vinars quest di per segirar la reelecziun. Auters din ch'ins haja augmentà la provisiun da vinars per l'enviern fraid.
La fiera da tut ils products destillads ha en mintga cas tradiziun.
Per Beni Simeon, che venda dapi 10 onns vinars a la fiera, hai dà in flot svilup en ils davos onns. Uschia saja ditg mo stà ina fiera da vinars da num. Uss haja dentant puspè intgins stans che porschian vinars. La fiera saja en general vegnida fitg populara, ed igl haja adina dapli persunas. Tge ch'i cumpran dependia dal gust persunal, il hit saja per blers dentant da pudair empruvar ils divers products.
Ed era el vegnia anc a far ina runda entras la fiera per guardar tge che vegn tut purschì.