Siglir tar il cuntegn
cuntegn

Surselva La firma Giger SA mida da Sedrun a Mustér

1997 han ils dus frars Uve ed Ivan Giger construì l’emprim bajetg a Drun sut Sedrun. Uss, suenter passa 20 onns, midan els e construeschan in bajetg nov a Pignola / Segnas en la vischnanca da Mustér. Las localitads a Drun cun garascha dubla e halla industriala vegnan vendidas.

A Pignola / Segnas vegn il nov bajetg da la firma Giger SA.
Legenda: A Pignola / Segnas vegn il nov bajetg da la firma Giger SA. RTR, Hubert Giger

A l’entschatta eran els 3-4 lavurers, uss sajan els 10. Pli blers ch’els sajan vegnids e pli stretg ch’i saja vegnì, raquinta Uve Giger (el e ses frar Ivan possedan e mainan la firma). Alura hajan els construì in bajetg annex vid il lavuratori ed era pudì engrondir il spazi cun ina garascha dubla. Mo dapi quatter onns pondereschian els, co optimar il manaschi. Ina varianta fiss stada da colliar meglier ils bajetgs a Drun. Els hajan dentant stuì constatar che l’investiziun fiss stada relativamain auta, e perquai sajan els sa decidids dad ir a Pignola, nua ch’els hajan tut sut in tetg.

Visualisaziun da la firma nova a Pignola
Legenda: Visualisaziun da la firma nova a Pignola Firma Giger SA

Tut sut in tetg

Il bajetg nov è 22 sin 62 meters. Da la vart dretga datti in suttetg nua ch’ins po metter la blocca da fin 10 tonnas. Quella blocca vegn transportada en la halla da resgiar, e suenter van las plattas en lavuratori, nua ch’ellas vegnan elavuradas e nua che las pignas scalegl da 600 kilos fin 4 tonnas vegnan messas ensemen. Vendidas vegnan ellas en Surselva (ca. 1/3), en l’ulteriur Grischun (1/3) ed en auters chantuns en Svizra. La firma Giger ha dus collavuraturs en il Vallais e dus a Lucerna. En quest bajetg datti era plaz per exponer ils products.

Enavos tar las ragischs

A Pignola exista gia in bajetg dals Gigers, quel ch’il bab Ignaz ha gì construì 1974 per producir pignas scalegl. Uss turnian els enavos tar las ragischs, di Uve. La dumonda da bajegiar è publitgada. Sche tut va sco previs, veglian els cumenzar a bajegiar la primavaira 2019, ed in onn pli tard pudess il bajetg nov esser en funcziun.

Il bajetg ch'il bab Ignaz Giger ha construì 1974.
Legenda: Il bajetg ch'il bab Ignaz Giger ha construì 1974. RTR, Hubert Giger

Ord l'archiv RTR

La pigna scalegl - il cor da la chasa

Legenda: Guardar il video Cuntrasts. Durada 24:52 minutas.
Or da RTR dals 29.10.2006.

RR actualitad 11:00