En la vegliadetgna da pensiun n'èn Giusep e Claudia Columberg anc betg. Ma tuttina han els vendì il manaschi da hotel e restaurant ch’els han cumprà avant 13 onns. Els sajan vegnids cussegliads da far quai a temp e betg da spetgar, declera Claudia Columberg. Els avevan quintà che quai duria dus, trais onns, ma la finala saja quai ì strusch in mez onn e tut è stà vendì. Per els constettia dentant ch'i saja capità svelt la finala, di Claudia Columberg. Mender fiss stà sch’els avessan stuì chalar u sch’els n’avessa betg chattà in successur. Uss han els chattà ina famiglia che vul manar vinavant quai e quai saja in grond plaschair.
Blers onns manà cun cor
Els han manà lur manaschi sur tut quels onns cun grond cor. Ed uss èsi in egl legraivel ed in che bragia. Surtut ils ultims dis sajan stads fitg intensivs. Il venderdi ha sunà la musica da Mustér per cumià e la sonda la musica da tschaiver «Las Bagordas». Uschia han els pudì dar adia a tut las uniuns ch’han sustegnì els sur tut quels onns, declera Giusep Columberg ch’ha cuschinà sur tut quels onns sez.
Il dar adia è stà emoziunal e propi realisar che tut è uss finì, vegnian els pir en in pèr dis. Eventual na saja quai dentant betg la fin da lur carriera gastronomica, ma segir na vegnian els betg a far pli in uschè grond manaschi, forsa insatge pli pitschen, ma quai n'è tut anc betg sclerì ed uss hajan els gea temp da ponderar, di Giusep Columberg e truscha per l’ultima giada en ses restaurant la chazzetta.
