Siglir tar il cuntegn
Inhalt

Surselva La guglia da 2'800 onns da la Val Russein

En la Val Russein ha Remo Degonda chattà l’october da l'onn passà ina guglia da bronz cun plirs chaus. Il servetsch archeologic dal chantun ha alura taxà la guglia sco object ord l'otgavel tschientaner avant Cristus.

La guila chattada en la Val Russein.
Legenda: La guila chattada en la Val Russein. mad

La guglia chattada è ord il temp da bronz ed aveva ina lunghezza originala da 20 centimeters. La grondezza actuala da la guglia è 7,5 centimeters, quella ha damai patì da las relaziuns aut alpinas. Tuttina ha la furma da la guglia e la consistenza chaschunà ina tala fascinaziun per Remo Degonda, ch'el ha prendì ella a chasa e la finala surdà ella al servetsch archeologic dal chantun Grischun.

Talas scuvertas vegnan savens fatgas tar pass

Il servetsch archeologic dal chantun ha confermà che talas scuvertas sajan mintgamai in pitschen toc en il mosaic per pudair chapir l'impurtanza da passagis tras las muntognas. Ins stoppia dentant adina resguardar la situaziun dal chat, uschia sajan en spundas taissas savens chaussas che sajan idas a perder mo per schabetg en quest lieu. Era pussaivel sajan en quest cas che la guglia chattada saja stada ina unfrenda per engraziar per il bun passagi u insatge sumegliant.

RR actualitad 17:00