Siglir tar il cuntegn

Header

audio
Sin tura per reparter gasettas
Or da Actualitad dals 28.09.2021.
laschar ir. Durada: 02:46 minutas.
cuntegn

La lavur da portagasettas Reparter gasettas dapi 14 onns

Il di da lavur cumenza per Theolinda Wolf tranter las 04.15 e las 04.30. Alura metta ella las gasettas abunadas e reclamas en las chaschas da brevs da Trun e conturn.

Theolinda Wolf metta «La Quotidiana», la «Südostschweiz» ed il «Bündner Tagblatt» en las chaschas da brevs dals abitants e da las abitantas da Trun. Quai fa ella il pli bler senza lampa da maun – era sch'igl è anc stgir la damaun da las 04.30. Suenter tants onns sappian ins tgi che haja abunà tge gasetta, di la mamma da tschintg uffants.

A mez il vitg parchescha ella l'auto sper via, prend ora las gasettas sortadas e reparta alura quellas a pe. Era sch'ella ha avunda peda da reparter, va ella cun in pass spert.

Legenda: Las gasettas e reclamas per las abitantas ed abitants da Trun e conturn. RTR, Carmen Monn

Avant 14 onns cura che ses uffants eran anc pitschens ha ella cumenzà cun quella lavur:

Igl era pratic da lavurar cura ch'ils uffants durmivan. Uschia na stuev'jau betg bandunar la chasa la saira.
Autur: Theolinda Wolf portagasettas

Anc oz schazegia ella las bellas varts da quella lavur: Guardar co il sulegl leva, esser en l'aria frestga – ed era l'esser persula.

Cunzun l'enviern stentus

Ma era ella sa che la plazza da portagasettas n'è betg fitg tschertgada. I na saja betg uschè attractiv da lavar baud la damaun e cunzunt l’enviern saja stentus. Alura na sajan las vias anc betg libras da naiv.

Il di da lavur n'è betg finì

Tranter ina ura e mez e duas uras ha la dunna da 47 onns peda da reparter las gasettas. Sin las 06.30 ston tuts avair lur gasettas abunadas. Ma lura n'è il di da lavur anc betg finì per Theolinda Wolf. Ella va a lavurar en sia fatschenta da fluras a Rabius e da mezdi giaja ella a chasa a far gentar per ses uffants. Ed era il suentermezdi haja ella adina insatge da far.

RTR actualitad 07:00

Artitgels legids il pli savens

Scrollar a sanestra Scrollar a dretga