Siglir tar il cuntegn

Header

Ina via stretga sper il Rain la chaglias en tut alvas, scheladas.
Legenda: La senda tras la Ruinaulta n'è betg ina via da luxus. RTR, L. Livers
cuntegn

Surselva La lingia per la via tras la Ruinaulta è dada

La regenza grischuna ha approvà il plan directiv, concludì dal parlament regiunal da la Surselva il settember passà. Per las uniuns da l'ambient na datti nagina pussaivladad da far recurs encunter quest plan directiv.

Ina punt per il peduns sper il Rain en la Ruinaulta
Legenda: La punt da peduns idillica dadora Castrisch RTR, L. Livers

Jaqueline von Arx, la manadra da la Pro Natura Grischun ha ditg envers RTR che quest fatg saja simplamain dad acceptar.

Quai munta che la senda da viandar tras la Ruinaulta po vegnir bajegiada, respectivamain che la lingia nua la via va tras è definitiva. I dettia anc obstachels, els sajan però pli pitschens ch'avant. L'emprim obstachel è da dumagnar tras il plan d'utilisaziun da la vischnanca da Trin. Il davos traject da la via tras la Ruinaulta è numnadamain sin territori da Trin. Encunter quest plan d’utilisaziun san las uniun da l'ambient far recurs.

Sch'ils plans da construir la senda fin il 2018 èn realistics, n'è betg cler. Christian Theus, il president da l’Uniun Ruinaulta, manegia che prender in obstachel suenter l’auter mainia ad ina buna fin. Per el saja stà il plan directiv in da quels obstachels, ed ussa giaja vinavant.