Ensemen cun la vischnanca Gampel-Bratsch (VS) e la vischnanca Val Stussavgia è la Lumnezia ina da las emprimas trais vischnancas che han survegnì il label da “vischnanca attractiva per giuvenils”. Il label surdat La Gruppa svizra per las regiuns da muntogna (SAB). Quella gruppa ha era definì il catalog da pretensiuns, che las vischnancas ston ademplir per survegnir il label.
Cundiziuns per survegnir il label
Tranter las pretensiuns per survegnir il label dat i duas che han stuì vegnir ademplidas. Sco emprim ston ils giuvenils vegnir dumandads directamain, tge giavischs ch'els han. Quai vegn la Lumnezia a far cun tractar il tema en las classas dal stgalim superiur. La secunda pretensiun obligatorica è, che la vischnanca sto delegar in giuvenil che represchenta la vischnanca en in forum da discussiun. In forum che vegn organisà da la SAB e nua che giuvenils da las vischnancas che han survegnì il label discurran sur da lur problems.
Schanza per lantschar il tema
Tenor la manadra dal departament d’educaziun da la Lumnezia Elisabeth Lorez, è il label cunzunt ina schanza per lantschar il tema en vischnanca. Fin uss na saja quai betg vegnì discussiunà sin il plaun politic, era sche la Lumnezia haja da cumbatter encunter la depopulaziun.
Structuras adequatas mancan
Enfin uss na disponiva la vischnanca era betg da structuras adequatas. Sco emprim pass ha la suprastanza da la vischnanca uss furmà ina cumissiun che surpiglia la coordinaziun. I dovria numnadamain la collavuraziun da tut ils pertutgads: la politica, l’economia, la Baselgia e la scola.