Questa reducziun da 9 sin 5 suprastants cuntrafa al contract da fusiun dal 2012. Quest preveda 1 commember da mintga vischnanca d'avant la fusiun. Giuridicamain stuess la Lumnezia sa tegnair vinavant vi dal contract, pretenda dentant il chantun.
Il departament da finanzas e vischnancas è betg cuntent cun l'agir da la vischnanca Lumnezia. Sco quai che la cussegliera guvernativa Barbara Janom Steiner ha ditg ad RTR, avevia il departament gia avertì las instanzas politicas da la Lumnezia da betg prender en mira questa reducziun da 9 sin 5 commembers da la suprastanza.
La Lumnezia insista
Il president da la vischnanca Lumnezia, Duri Blumenthal, fa valair che la Lumnezia haja gia tar l’emprima elecziun da la suprastanza betg adempli il contract da fusiun. Il contract da fusiun pretenda che mintga anteriura vischnanca tschentia 1 commember en suprastanza. Vignogn haja gia tar l’emprima elecziun betg tschenta in suprastant e Vrin haja la finala survegnì in suprastant che avevi fatg ina suletta vusch.
Quests arguments lubeschian però betg da rumper il contract da fusiun, di Barbara Janom Steiner. Dapi la fusiun n'haja midà nagut che clamassi ina tala reducziun da la suprastanza. Uschia stgaffeschia la Lumnezia in cas da precedenza, di la cussegliera guvernativa.
La regenza ha il davos pled
La dumonda è, sch'il contract da fusiun è in contract che vala en perpeten, u sch'el po vegnir midà cun la maioritad da las vuschs dal pievel. En mintga cas decida la Lumnezia sur da la reducziun da 9 sin 5 suprastants. La decisiun pretenda ina midada da la constituziun, quai che appartegn il dumber da suprastants. E questa midada da constituziun sto vegnir approvada dal la regenza. Pia ha la regenza il davos pled en chapitel.
RR Actualitad mezdi 11:00