Tranter cumpogns pli pitschens na dattan els betg uschè en egl sco la «Panera» da Luven – ma era ils pigns sper il campadi Fontanivas a Mustér èn gigants. Malgrà ch’els èn be var 150 onns vegls èn els marschs e pudessan perquai crudar enturn. Cun quai ch'intgins dals pigns sa chattan en vischinanza dal plaz da rulottas mettessan els da stad en privel ils giasts dal campadi. Perquai ha l’uffizi forestal da Mustér decis da smerscher els.
Smerscher ils gigants è ina sfida
Malgrà la gronda rutina dal selvicultur Simon Cathomen e ses team è smerscher tals gigants ina sfida tut speziala. Els hajan da planisar bain nua ch’ils pigns duajan crudar per ch’els na fetschian betg gronds donns. Smerscher els d’enviern saja d’avantatg cun quai ch’il terrain è schelà.
Er la maschina da racolta vegn a ses cunfins: La tocca dals pigns smers ch'ella ha da strair or dal guaud paisa per part fin ad 8 tonnas.
Dad ina vart fai plaschair da smerscher els cun quai ch’els èn marschs ed in privel per la glieud. Da l’autra vart fai era mal da stuair smerscher uschè bellezza pigns.
Tschintg gigants ston davent en tut. Mintgin dad els dat enturn 10 cubics laina. Quella po be anc vegnir duvrada per far zinslas per il stgaudament da Mustér. Quai è in pitschen confiert per quels dal campadi. In exemplar bel e grond è anc frestg e saun – e quel dastga survegliar vinavant las tendas e rulottas a Fontanivas.
TR Telesguard 17:40
