Siglir tar il cuntegn

Header

video
La punt amez il Lai da S. Maria
Or da Telesguard dals 29.03.2017.
laschar ir. Durada: 3 minutas 1 Secunda.
cuntegn

Surselva La punt amez il Lai da S. Maria

Mo mintga quattertempras èsi da vesair la punt da l’anteriura via che manava dal funs da la val sin il pass dal Lucmagn.

Tenor l’Axpo saja stà l’avrigl 2010 l’ultima giada ch’ins haja vis la punt en il lai da fermada S. Maria sin il pass dal Lucmagn. Ussa èsi puspè uschè lunsch. En il lai ha quai actualmain uschè pauca aua, che la punt romana, che manava avant passa 50 onns il traffic sur il Rain da Medel, è da vesair. Gist dasperas eran da lez temp era ina chaplutta e l’ospizi S. Maria cun ulteriurs bajetgs. Quels na ves’ins betg, perquai ch’els èn vegnids disfatgs avant ch’il lai è vegnì emplenì 1968.

audio
Pass Lucmagn: La punt amez il Lai da S. Maria
ord Total local dals 29.03.2017. Maletg: RTR, Gion Huonder
laschar ir. Durada: 2 minutas 47 Secundas.
Giu cheu sut l’aua haiel jeu luvrau ed ussa eis ei mo aua.
Autur: Mariuschla Derungs

L'ospizi era fitg vegl

L’emprim ospizi da S. Maria ha la claustra da Mustér laschà construir 1374 (Val Medel, 1996). Ils bajetgs ch’eran sco ultims en quest lieu var 2 kilometers sut l’aut dal pass dal Lucmagn èn dentant betg stads uschè vegls. La part nova datava dal 1918. Mariuschla Derungs (83) che ha lavurà sco camariera durant intgins onns fin 1962 en l’ospizi sa regorda: «I era fitg simpel, per betg gist dir primitiv.» Tut eri fitg vegl, ma ella lavuravi gugent là. I eri sco ina famiglia.

Maridà a S. Maria

Mariuschla Derungs ha era emprendì d’enconuscher a S. Maria ses um. Lez lavuravi a Stgegia sco chauffeur da camiuns. L’october 1962 ha ella lura maridà ses Felix e quai sa chapescha en la chaplutta da S. Maria e lura fatg la festa en l’ospizi. Nua ch’els dus èn lura era stads sur notg. Ma las chombras eran veglias e letgs in sper l’auter quai n’avevi betg, raquinta Mariuschla Derungs cun in surrir.

1965 è l’ospizi nov sin l’aut dal pass vegnì avert. Lura han ins era cumenzà cun la construcziun dal lai da fermada. Quel è stà a fin 1968. L'ospizi vegl, la chaplutta ed ils bajetgs datiers èn vegnids spazzads. Il sulet ch’è restà è la punt e quella dat, sco quest onn, anc perditga dals blers tschientaners che l’ospizi era anc en quest lieu.

Cumparegliaziun dals maletgs

Stuschar reglader a sanestraStuschar reglader a dretga
Legenda:La punt oz ed antruras cun l'ospizi.

RR actualitad 12:00

Artitgels legids il pli savens