Siglir tar il cuntegn

Header

cuntegn

Surselva La pura da la Val Medel e sias chauras

«LANDLUFT – Bergbäuerinnen im Porträt», quai è il nov cudesch da Daniela Schwegler. En quel purtretescha ella era ina pura giuvna da la Val Medel, Eveline Hauser.

audio
Mezdi: Il nov cudesch «Landluft» sur da puras en la muntogna
ord Actualitad dals 06.07.2017.
laschar ir. Durada: 2 minutas 40 Secundas.

Vatgas-mamma e chauras

Eveline Hauser e ses partenari Dominik Waldmeier vivan a Soliva, in vitg sur Curaglia. Els han 13 vatgas-mamma, 70 chauras e cultiveschan en tut 27 hectaras funs. Cura ch’els en vegnids ad abitar en Val Medel avevan els cumenzà a far trekkings cun chauras, e quai fan els anc adina sper la lavur da pur. L’onn passà han els pudì prender a tschains in bain puril d'in indigen.

Soliva
Legenda: Soliva Stephan Bösch

In animal spezial

La pura da 34 onns è creschida si a Seelisberg en il chantun Uri. Ella ha emprendì da cusunza. Suenter ch’ella è stada pastra si l’alp Puzzetta, èn ella e ses partenari sa decidids da restar en Val Medel. Eveline di ch’ella haja gugent animals, ma surtut las chauras. Ellas sajan mirvegliusas, ellas sappian tge ch’ellas veglian, ma ellas possian era trair ora l’ultim gnerv. Schegea che la tratga da chauras na saja betg lucrativa veglia ella cuntinuar cun il project da trekking.

Segar cun la fautsch
Legenda: Segar cun la fautsch Daniela Schwegler

Istorgia orala

Il cudesch da Daniela Schwegler cuntegna fotografias da Stephan Bösch, tranter auter ina che mussa la pura da Soliva che sega cun la fautsch. Sco l’autura ha ditg envers RTR lavuria ella cun la metoda da oral history, vul dir: Ella lascha discurrer las protagonistas senza intervegnir ubain valitar. Ella saja sco in figl alv che laschia raquintar insatgi sia istorgia. En tut en purtretadas en il cudesch 12 puras tranter quellas era ina dunna da la Val Müstair.

Settavel senn

Daniela Schwegler ha accumpagnà Eveline Hauser durant trais dis e registrà ils discurs. Spezial saja stà che questa dunna giuvna haja in settavel senn per umans ed animals, ella sentia sch'i na giaja betg bain cun els.

Il cudesch cun purtrets da puras è il terz da l’autura da Widnau /SG. Ella ha gia publitgà in cudesch sur da dunnas ad alp ed in sur da dunnas che mainan ina chamona.

RR actualitad 11:00

Artitgels legids il pli savens