Siglir tar il cuntegn

Header

La gruppa da studentas e students da la scol'auta da Turitg che ha elavurà ils projects.
Legenda: La gruppa da studentas e students da la scol'auta da Turitg che ha elavurà ils projects. ANR, Hans Huonder
cuntegn

Surselva La Val Medel «goes social»

En connex cun il project «Giuventetgna muenta la Val Medel» ha la scol’auta da Turitg ZHAW elavurà quatter projects. Realisar quels projects vegnan uss las gruppas indigenas. Ils projects èn vegnids preschentads a la populaziun en l’anteriura scoletta a Curaglia.

Il di da Nadal vegn lantschà il project «Val Medel Goes Social». Sin Instagram e Facebook sut @valmedel.info vegnan ils dus giuvens Silvan Giger e Danilo Giger a publitgar fotografias ed istorgias da la Val Medel. Uschia duai la popularitad da la val vegnir promovida. Planisà esi era da lantschar puncts da survista e da promover la popularitad da quels. Purtar il project vegn la vischnanca da Medel.

La giuventetgna fa in «FestiVal Medel»

La stad vegn la Val Medel a far festa. L’uniun da giuventetgna vegn a far ils 22 d’avust 2020 ina festa cun in martgà per products indigens e plirs concerts. Ils students han preschentà las pussaivladads uschia che l’uniun da giuventetgna po uss tschertgar sponsurs.

Bike&Hike Val Medel

In dals projects prevesa da realisar sis rutas da mountainbike e da viandar. Il project vul surtut nizzegiar las attracziuns gia dadas e las vias existentas e cumbinar ellas cun culinarica e cultura. Era duai dar rutas adattas per e-bikes. Realisar il project vul ina gruppa da lavur cun pliras persunas da la Val Medel. Planisà esi da lantschar las rutas novas proxima primavaira.

Via da puma a Curaglia

Il quart project è concepì sur plirs onns e vegn sco sulet realisà da la vischnanca. Uschia duai dar en il vitg da Curaglia fin a 40 pumers auts. Las lavurs duajan cumenzar la primavaira. Era duai dar maisas e pussaivladads da pudair grillar. Cun tavlas d’infurmaziun vul il project era porscher pussaivladads da tematisar per exempel l’istorgia da la Val Medel. Fin il 2025 duai il project esser realisà.

RR novitads 06:00