Laax: Arena Alva cun in gudogn da 4,5 milliuns francs

Ina stad mediocra, in lev plus tar il dumber da visitaders durant l’enviern e cunzunt damain custs han puspè manà la gruppa en las cifras nairas. Quai suenter ina sperdita dad in milliun francs l’onn da gestiun 2015/16.

Il sulegl glischa puspè per l'Arena Alva. Bild in Lightbox öffnen.

Legenda da maletgs: Il sulegl splendura puspè per l'Arena Alva. RTR, C. Albin

La stad 2016 saja stada mediocra, scriva il cussegl d’administraziun en il rapport per l’onn da gestiun 2016/17. Plievgia e temperaturas bassas hajan impedì ina buna entschatta. Cun 97’505 emprimas entradas sajan tuttina 1’828 giasts dapli che anc l’onn passà vegnids en il territori la stad. Quai malgrà che la pendiculara da Cassons na saja per l’emprima giada betg stada en funcziun. Era las pernottaziuns da la stad sajan creschidas per 16.5% sin total 26’149 notgs. Quai grazia a purschidas spezialas per famiglias en il rocksresort ed era pervia dal parlament europeic da giuventetgna, che saja stà l’atun en il Riders Palace.

Reto Gurtner durant l'avertura da la telecabina La Siala l'onn 2015. Avrir maletg en lightbox.

Legenda da maletgs: Il president da l'Arena Alva Reto Gurtner durant l'avertura da la telecabina La Siala l'onn 2015. RTR, L. Livers

In lev plus l’enviern

Era l’enviern haja cumenzà mal. Suenter l’emprima naiv il november haja ditg dà nagina pli e mo grazia als chanuns da naiv saja stà pussibel d’insumma porscher pistas sur Nadal e Bumaun. Tuttina saja gartegià da carmalar 30’283 giasts dapli che l’onn passà en il territori da skis.

Cun total 878’562 entradas per l’entir onn da gestiun 2016/17 sajan 3,8% dapli persunas vegnidas en il territori da skis che anc il 2015/16. Quai saja dentant anc adina 2,2% pli pauc che la media dals davos tschintg onns ed il segund schlet resultat dapi la fusiun 1996 da las pendicularas da Flem e Laax.

Damain svieuta

2016/17 ha l’entira gruppa Arena Alva cuntanschì ina svieuta da 85,3 milliuns francs, 3,5 milliuns damain che l’onn avant. Cunquai ch’ils custs da persunal e per material han savì vegnir reducids per pli che 6 milliuns francs, è il cash-flow s’augmentà a 22,2 milliuns francs (2015/16: 17,5 milliuns) ed il gudogn net munta a 4,5 milliuns francs.

RR actualitad 17:00