- Chasa d’albiert da giuventetgna: 8 milliuns francs per 160 letgs
- Renovaziun ed engrondiment dal bogn e wellness per 8,25 milliuns francs
- Tut ensemen 25 plazzas novas
En il messadi scriva la vischnanca, ch'il project saja semtgà sche la radunanza communala approvescha il credit da 16,25 milliuns francs. Sche quai è il cas entschaivan las lavurs l'emprim quartal dal 2019. Sin l'entschatta da l'onn da scola 2020/21 fiss il bogn puspè avert.
La nauscha nova è ch'il bogn cuvert sto vegnir serrà durond l'entira fasa da bajegiar. Oriundamain era previs da pudair avrir il bogn suenter in mez onn d'interrupziun.
Dus projects ina cumparsa
Ils dus projects Aua Grava e WellnessHostel 3'000 tutgan ensemen. La renovaziun ed engrondiment dal bogn cun las parts da wellness è atgnamain la part che la vischnanca stueva tuttina far baud u tard per ademplir las pretensiuns d'in bogn cuvert modern cun parts da wellness en in lieu da turissem.
Collavuraziun totala
La cumbinaziun cun in albiert da giuventetgna e wellness datti gia a Saas Fee en il Valais.
La chasa d'albiert da giuventetgna WellnessHostel 3'000 cun 160 letgs vegn administrada da l'organisaziun chasas d'albiert svizras. Ella surpiglia era l’administraziun per il bogn e per il wellness. Gest questa cumbinaziun ha purtà fritg a Saas- Fee. Laax quinta da pudair uschia far ord il bogn che scriva dapi onns cifras cotschnas in' instituziun che scriva cifras nairas. Il WellnessHostel 3'000 prenda a tschains il bogn e paja persuenter. Plinavant vegn la vischnanca perfin participada cun 50 % vid in eventual gudogn.
Per la populaziun, ils giasts, scolaras e scolars da Laax sa mida nagut. Els han vinavant cundiziuns spezialas per l'entrada. Cun quai entir cumplex vegn creà radund 25 plazzas en la regiun.
RR actualitad 17:00