Ina gruppa da tschintg persunas chaminava la dumengia da Laax Murschetg sin la via principala en direcziun Laax. A las 03:30 ha l'auto d'in um da 24 onns ch'era sin via en direcziun Laax tschiffà duas persunas da la gruppa. Ina dunna da 27 onns è vegnida blessada grevamain. Ella è vegnida manada cun l'ambulanza en l'ospital chantunal a Cuira, nua ch'ella è morta la dumengia suentermezdi en consequenza da las blessuras. In'ulteriura dunna da 26 onns è vegnida blessada mez-grev. Ella è vegnida transportada en l'ospital a Glion.
Tar l'automobilist èsi vegni controllà il sang e l'urin. Il permiss dad ir cun auto ha el stuì dar giu immediat. Ensemen cun la procura publica examinescha la Polizia chantunala l'andament da l'accident.
RR novitads 18:00