L’administraziun da quatter scolas cun quatter cussegls da scola ha manà a l'idea da metter tut quai sut in tetg. Quai na saja betg ina nova idea, manegia Thomas Candrian il president da la vischnanca da Sagogn. A Sagogn è lura er stada l’emprima orientaziun da quella midada.
- Ord quatter cussegls datti in, che vegn manà professiunalmain d'ina persuna dal fatg.
- In sulet consorzi è era la direcziun per la fusiun da las vischnancas da Laax Sagogn e Schluein che stat avant porta.
- Per ils uffants da Laax e Falera mida il nov consorzi nagut.
- Per ils uffants da Schluein e Sagogn datti midadas.
La scoletta, l’emprima e segunda classa restan mintgamai en l'agen vitg, en la 3. 4. classa van ils uffants da Schluein a Sagogn. En la 5. e 6. classa van quels da Sagogn a Schluein a scola. I dat scolas cun mintgamai mo ina classa.
Las cifras da scolars e scolaras han manà a quella decisiun. A Sagogn van las cifras da scolars enavos e quai da 65 ussa sin 53 en 5 onns. Cuntrari ési a Schluein, là crescha il dumber da scolars da 52 sin 57 durant il medem temp. Quai na sajan betg cifras che sforzan insatgi da fusiunar u da collavurar, ma per optimar la scola sur quels dus vitgs saja quai optimal, dian ils manaders da quai project Martin Mathiuet e Josef Willi.
Ussa vegnan tuttas quatter vischnancas orientadas ed il december vegn gia votà sur da quai project, che duai vegnir realisà gia cun l'onn da scola 2022/23.