Siglir tar il cuntegn
cuntegn

Surselva Laax: Gea a la senda da tschimas

A Laax pon ins construir ina senda da lain che va da Murschetg a Laax vitg. La radunanza communala da Laax ha approvà il plan d’avertura general cun 173 encunter 107 vuschs e concedì il credit da 7.5 milliuns francs cun 171 encunter 106 vuschs.

Legenda: Guardar il video Laax po fabritgar. Durada 00:25 minutas.
Or da Telesguard dals 06.12.2018.

Il gea a la senda da tschimas saja d'acceptar, quai saja ina decisiun democratica, di in dals adversaris dal project Gion Balzer Casanova. Mo sa chapescha ch'el saja in zic trumpà.

Vinavant discurrer avertamain in cun l'auter

Tranter ils aderents dal project è Reto Gurtner, il president dal cussegl d'administraziun dalla Gruppa Arena Alva. El chapescha che la glieud, che viva damanaivel da la sortida da la senda da tschimas a Dimplaun, n'haja betg grond plaschair da quella.

I saja dentant stà fitg bun ch'ins haja pudì discurrer avertamain a la radunanza communala. Quai stoppia Laax mantegnair e na betg cumenzar cun acziuns da figls sgulants anonims. Quai fiss la fin da la democrazia.

Democrazia è discutar

Il president communal da Laax Franz Gschwend ha quintà ch'il project dettia da discutar. Quai saja la democrazia ed i saja impurtant da discutar.

Uss ston anc ils proprietaris da funs acceptar il project ed il chantun sto dar la lubientscha da bajegiar. Sche tut va sco previs pon ins cumenzar a bajegiar la senda da tschimas l’avust 2019, l’inauguraziun pudess esser l’october 2020.

Pe da taglia resta a 50 %

Plinavant ha la radunanza communala da Laax approvà il preventiv 2019 che quinta cun entradas da 14 milliuns francs ed in gudogn da 39’000 francs. Il pe da taglia resta a 50 % da la taglia chantunala simpla. E la finala han ils da Laax era ditg gea al credit da 1.8 milliuns francs per sanar il Center la Cauma.

RR novitads 06:00