Cun in mountainbike electric ha ina dunna gì in grev accident datiers da Laax.
Sonda cunter saira enturn las 17:30 uras era la dunna da 29 onns da viadi sin l'uschenumnà «Neverend Trail» da Crap Sogn Gion vers Laax. Curt suenter la fin da quest traject da downhill saja la dunna cupitgada ord raschuns nunenconuschentas, scriva la Polizia chantunala dal Grischun. La Rega ha lura transportà la dunna cun grevas blessuras da la fatscha en l'Ospital chantunal a Cuira.